Samfelagstilvit
Við ágrýtni og greiðum málum, hevur Nema arbeitt umhvørvið inn í gerandisdagin og gjørt ESG frágreiðing og mannagongdir, ið skulu tryggja góðan og sunnan umhvørvisligan atburð.
Grønar teldur
Elektroniskt burturkast er ein alsamt vaksandi altjóða trupulleiki, og sum ein av føroya størstu veitarum av alskyns kt-útgerð, kenna vit tað sum okkara ábyrgd at tryggja, at so nógv sum gjørligt verður endurnýtt og burturbeint á rættan hátt.
Tí ber til at lata tín brúkta elektronikk inn til Nema handlarnar, og so syrgja vit fyri, at tað verður burturbeint rætt.
Nema samstarvar við Foxway, sum er ein altjóða fyritøka, ið er serkøn innan burturbeining og at endurnýggja teldur, telefonir og annað. Umframt at burturbeina og endurnýggja vørur tryggjar hetta samstarvið eisini, at allar dátur verða burturbeindar á rættan og tryggan hátt. Hetta er eitt samstarv, ið vit bjóða okkara vinnukundum at fáa ágóðan av, tá teir skulu av við gomul tól. Harafturat njóða vit 3 ára garanti upp á allar vørur, ið vit selja til vinnuna.
Grønir bilar
Nema er virkið kring landið, tá ið tað snýr seg um viðskiftafólk, farnet, breiðband og ymisku deildirnar. Til tess at minka um útlátið nýta vit framkomnar tøkniloysnir sum Knatt, ið ger tað lættari at samskipa koyringina og vísir okkum á koyritørvin. Við hesum síggja vit skjótt, um tørvur er fyri einum bili afturat, ella um ein skal takast úr nýtslu.
Umframt nýggjastu tøknina er el-bilurin vorðin ein partur av okkara bilflota, og bensin- og dieselbilarnir verða skiftir út so hvørt við el. Í dag eru umleið 47% av øllum bilum hjá Nema el-riknir. Eingin bensin ella diesel bilur er keyptur síðan málini vórðu sett í 2022. Allir bilar, ið eru skiftir út seinastu árini, eru skiftir út við el-bilar.
Harafturat hevur Nema gjørt íløgu í el-løðistøðum uttanfyri kontrórið á Smyrilsvegi í Havn. Hetta ger tað meira ómakaleyst hjá okkara starvsfólkum at løða bæði persónligu bilarnar og arbeiðsbilarnar.
Grønt burturkast
Røtt burturbeining av elektronikki er ein týdningarmikil liður í at verja bæði umhvørvið og náttúrutilfeingið – og stuðlar einum burðardyggum samfelagi.
Í samband við Umhvørvisvikuna í Vestmanna kommunu løgdu vit dent á burturbeining av elektronikki. Tí høvdu vit ein bás til elektroniskt burturkast á ruskplássinum í Vestmanna. Við okkum høvdu vit ein knúsara til harðdiskar, ið tryggjar, at dátur og elektronikkur verða burturbeindar rætt. Hetta er eitt afturvendandi tiltak í Vestmanna kommununu.
Orsaka av góðu undirtøkuni í Vestmanna hava vit gjørt av at geva okkara kundum sama møguleika. Hvønn dag ber til at koma inn í Nema handilin í Havn fyri at burturbeina elektronikk á rættan hátt og tann fyrsta mánadagin í hvørjum mánaða er møguligt at fáa knúst harðdiskin á staðnum. Harðdisk knúsarin tryggjar, at allar dátur verða oyðilagdar.
Grønt pappír
Vit seta høg krøv til okkara veitarar og fara eftir dygdini. Alsamt fleiri av okkara veitarum hava í dag umhvørvisstempul av ymiskum slag og kunnu veita trygd fyri, at teirra undirveitarar framleiða eftir ávísum umhvørviskrøvum.
Nakrir av okkara størstu veitarum eru Dell, Microsoft, Apple og Canon. Tað, ið allar fyritøkurnar, hava í felag er, at tær eru ISO 14001-góðkendar, hava vørur við energy star orkumerkinum og Epeat, hava endurnýtsluátøk, brúka umhvørvisvinarligt tilfar og hava ESG-frágreiðingar. Harumframt seta fyritøkurnar sær mál um at minka um CO₂-fótasporið og fremja burðardygga nýskapan.
Á kontórum okkara nýta vit kopipappír, ið hevur Eco Lable, Emas og FSC-góðkenningar. Umframt hetta nýta vit Recycled Classic kopipappír, ið eisini hevur fleiri umhvørvisgóðkenningar.
Haraftur verður dentur lagdur á, at vit í størsta mun keypa vøru, ið ikki hevur óneyðugt pakkitilfar.
Fyri góðum 6 árum síðan valdu vit at framleiða Nemakalendaran úr pappíri, sum hevur svanamerkið.
Grøna gávubrævið
Grøna Gávubrævið er stuðulsgrunnur hjá Nema, ið hevur til endamáls at stuðla átøkum, ið gera eitt miðvíst arbeiði fyri umhvørvið í Føroyum.
Allir peningurin, ið kemur inn í gjøgnum Nema Endurkeyp og sølu av posum í handlum okkara, verður latin til einstakling, áhugabólk ella felagsskap, sum hevur gjørt eitt miðvíst arbeiði fyri umhvørvið í Føroyum.
Nema eru aftur tilnevnd Føroya Besta Vørumerki
27. februar 2026 verða Føroya Bestu Vørumerki kosin fyri aðru ferð, og aftur í ár eru vit tilnevnd. Vit eru sera takksom fyri, at okkara arbeiði verður viðurkent. Vit leggja stóran dent á at vera nýhugsandi og kreativ við øllum, ið vit gera og skipa fyri.Vit eru sera spent og errin av at vera tilnevnd í bólkinum “Einstaklingamarknaður – 25 ella fleiri starvsfólk” saman við sterku vørumerkunum Elding, Smyrilline, Atlantic Airways, Bónus, SMS og Hotel Føroyar. Brandr Føroyar er fyritøkan aftanfyri tiltakið og tey skriva soleiðis “Eitt sterkt vørumerki økir virðið hjá fyritøkuni og sæst beinleiðis aftur á botnlinjuni. Branding skapar álit og kundatrúfesti, sum kann geva størri inntøkur og lægri marknaðarkostnaðir. Eitt sterkt vørumerki ger eisini fyritøkuna meira spennandi hjá bæði starvsfólkum og íleggjarum. Í síðsta enda er branding ein strategisk íløga, sum styrkir fíggjarligu úrslitini og skapar ein varandi kappingarfyrimun.” Hvussu verða føroya bestu vørumerki funnin? Við at velja Føroya bestu vørumerki, ynskir brandr at varpa ljós á týdningin og virðið av eini væl grunaðari vørumerkjastrategi. Tilgongdin til at finna bestu vørumerkini byggir á bæði akademiskar og verkligar metingar umframt meiningina hjá almenninginum um føroysk vørumerki. Dómsnevndin fyri FBV 2025 Dómsnevndin til Føroya Besta Vørumerki er eitt úrval av 35 ymiskum persónum, ið øll arbeiða í vinnuni. Sí hini tilnevndu í teimum triðmum flokkunum og limirnir í dómsnevndini á heimasíðuni hjá Brandr Føroyar. Brandr.fo
Sølufólk til okkara vinnutoymi
Vit leita eftir einum røskum og forvitnum persóni at gerast partur av okkara dynamiska sølutoymi og sum kann hjálpa okkum at vaksa uttanfyri Føroyar. Talan er um eitt sera spennandi og fjølbroytt starv, har tú fert at selja okkara skipanir uttanfyri Føroyar og samstundis vera við til at selja og skapa spildurnýggjar loysnir til føroyska vinnulívið. Tín fremsta uppgáva verður Søla av skipanum uttanfyri Føroyar Men eisini Søla av samskiftis- og KT loysnum í Føroyum Røkt av kundum At hjálpa føroyska vinnulívinum at mennast Vit vænta tí, at tú Hevur skil fyri KT og fjarskifti Klárar teg væl á donskum og enskum Hevur høgt tempo og er fleksibul Dámar og hevur lætt við at skilja og seta teg inn í nýggja tøkni Arbeiðir væl sjálvstøðugt og dugir at hugsa nýtt Hevur umstøður at nýta ein part av tíðini uttanfyri Føroyar Hevur royndir við sølu og torir at vera uppsøkjandi Afturfyri bjóða vit Eitt fjølbroytt og persónliga mennandi starv Góðar umstøður, gott samanhald og fult av ágóðum Eitt arbeiðspláss við fullari ferð og sum er í rúkandi menning Møguleikan at flyta føroyska vinnulívið inn í framtíðina Møguleikan at vaksa uttan fyri landoddarnar Um Nema Nema er ein føroysk fyritøka, ið skapar kapping og samstundis gongur á odda í menningini av føroyska samskiftis- og KT-marknaðinum. Nema er ein fyritøka í stórum vøkstri, og okkara úrslit seinastu árini hava verið framúr góð. Harumframt hava vit eitt gott og óformelt arbeiðsumhvørvi við á leið 70 starvsfólkum á okkara deildum í Tórshavn og Klaksvík. Løn og setanartreytir Løn verður sambært avtalu millum partarnar. Vilt tú vita meira um starvið, ert tú vælkomin at ringja til Róa B. Poulsen, sølustjóra, á tlf. 50 20 80. Umsóknir við prógvskjølum skulu vera okkum í hendi í seinasta lagi 11. januar 2026 Søk starvið her Onnur leys størv á Nema
Fíggjarfrøðingur til Nema
Vilt tú vera við til at menna og automatisera okkara fíggjargongdir, og samstundis gerast ein týðandi sparringsfelagi fyri alla fyritøkuna? So vilja vit fegin hoyra frá tær! Nema leitar eftir einum sterkum fíggjarfrøðingi (financial controller) við serligum denti á rakstur, dátugreining og roknskaparligar arbeiðsgongdir. Starvið er fulla tíð við byrjan 1. mars ella skjótast hareftir. Um starvið Sum fíggjarfrøðingur hjá Nema verður tú ein lyklapersónur í at optimera okkara roknskaparmannagongdir og tryggja góðsku og álítandi grundarlag í okkara roknskapardátum, samstundis sum tú røkir og umsitur vanligar roknskaparuppgávur. Tú fert eisini at hava ein týðandi leiklut sum sparringsfelagi fyri fyritøkuna, við serligum denti á fíggjardátugreining og KPI-frágreiðingar. Tín uppgáva verður at tryggja, at roknskaparmannagongdirnar virka væl, og at dáturnar í roknskapinum eru rættar og álítandi. Hetta er grundarlagið fyri at kunna leggja fram eitt haldgott roknskaparyvirlit, men er eisini avgerandi fyri arbeiðið við fíggjarætlan, eftirmeting og frágreiðing av KPI-lyklatølum. Við denti á góðsku í roknskaparmannagongdunum, sjálvvirkjan og KPI-eftirfylging, fert tú at verða við til at flyta fíggjardeildina á eina meira nútímans kós. Tínar fremstu uppgávur vera Eftirlit (controlling) og bókhaldsuppgávur Sjálvvirkjan og menning av fíggjargongdum Dátugreining og fíggjarfrágreiðingar At stuðla fíggjarætlanararbeiðinum At vera ein fakligur viðleikari fyri raksturin, við denti á innlit, samanhangir og lyklatøl Vit vænta tí, at tú Hevur eina hægri búskaparútbúgving, t.d. HD (1, 2), Cand.merc. ella Cand.oecon. Ert sterk/ur analytiskt Arbeiðir sjálvstøðugt og skipað Hevur royndir við PowerPoint, Excel og Power BI Dugir at byggja góð og álítandi sambond tvørtur um alla fyritøkuna Afturfyri bjóða vit Ein fakliga spennandi leiklut við stórari ávirkan á menningina av fíggjarfunktiónini Møguleika at seta tín dám á talgilding og sjálvvirkjan í Nema Eina deild við fakliga sterkum starvsfeløgum og breiðum samstarvi innanhýsis Eitt gott arbeiðsumhvørvi við góðum starvsfólkum og einari rúgvu av ágóðum Góða kantinu og starvsfólkatiltøk árið runt Um Nema Nema er ein føroysk fyritøka, ið skapar kapping og samstundis gongur á odda í menningini av føroyska samskiftis- og KT-marknaðinum. Nema er ein fyritøka í stórum vøkstri, og okkara úrslit seinastu árini hava verið framúr góð. Harumframt hava vit eitt gott og óformelt arbeiðsumhvørvi við á leið 70 starvsfólkum á okkara deildum í Tórshavn og Klaksvík. Løn og setanartreytir Fasta arbeiðsplássið verður á deildini hjá Nema í Havn. Løn verður sambært førleikum. Hevur tú spurningar, ert tú hjartaliga vælkomin at venda tær til fíggjarleiðara, Christian Svejdal, á teldupost csv@nema.fo ella á telefon 502056. Tá tú søkir, vinarliga send okkum eitt CV saman við eini umsókn, har tú lýsir viðkomandi royndir og førleikar. Umsóknarfreistin er 16. januar 2026. Søk starvið Aðrir starvsmøguleikar á Nema
Upplatingartíðir á jólum
Soleiðis hava handlarnir hjá Nema opið á jólum 1. – 16. desember: Opið sum vanligt 17. – 20. desember: Opið frá kl. 10 – 20 21. desember: Opið frá kl. 14 – 20 22. desember: Opið frá kl. 10 – 20 23. desember: Opið frá kl. 10 – 20 24.- 26. desember: Stongt 27. desember: Opið frá kl. 12 – 16 28. – 30. desember: Opið sum vanligt 31. desember & 1 januar: Stongt Tíðindi frá Nema
